गायिका कुन्ती मोक्तान, स्रष्टा भवानी खतिवडा र रोशन परियार सम्मानित
चर्चित गायिका कुन्ती मोक्तान, स्रष्टा भवानी खतिवडा, कवि रोशन परियार लगायत साहित्य, संगीत र सामाजिक क्षेत्रका व्यक्तित्व सम्मानित भएका छन् । मातृभूमि साहित्य मकवानपुरका अध्यक्ष कृष्णप्रसाद दाहालको अध्यक्षता तथा प्राडा लक्ष्मणप्रसाद गौतमको प्रमुख आतिथ्यमा सम्पन्न कार्यक्रममा सिटिइभिटी निर्देशक डा. शान्ति लामा, साहित्यप्रेमी मुक्ति गोविन्द वैद्य, वरिष्ठ संगीतकार शिलाबहादुर मोक्तान लगायतकाे उपस्थिति रहेकाे थियाे। कार्यक्रममा चर्चित गायिका कुन्ती मोक्तानलाई नित्य गोविन्द स्मृति–मातृभूमि संगीत पुरस्कार २०८१ प्रदान गरिएको छ। सो पुरस्कारको राशी २५ हजार रुपैयाँ रहेको छ ।
साहित्यकार प्राडा लक्ष्मणप्रसाद गौतमलाई २५ हजार रुपैयाँसहित मातृभूमि साहित्य पुरस्कार २०८१ प्रदान गरिएको थियो।
रोशन परियारलाई १५ हजार राशीको श्याम श्रेष्ठ स्मृति मातृभूमि पुरस्कार प्रदान गरिएकाे छ।
जीवन केसीलाई शारदा उप्रेती स्मृति मातृभूमि सम्मान कलासाधक १० हजार रुपैयाँसहित प्रदान गरिएको छ।
सामाजिक अभियन्ता विश्वकान्ति कलावती सुमार्गी पराजुलीलाई मकवानपुर श्री सम्मान प्रदान गरिएको छ।
त्यस्तै कार्यक्रममा बागमती प्रदेशकी मुख्य न्यायाधिवक्ता अप्सरा बस्नेत, डा. श्याम सुवेदी र लायन्स क्लब एस–३२५ की सेकेन्ड भाइस डिस्ट्रिक्ट गभर्नर अंकिता सुमार्गीलाई पनि सम्मान गरिएको थियो।
कार्यक्रममा मकवानपुरसहित विभिन्न जिल्लाका साहित्यकारहरूले रचना वाचेका थिए। गायिका कुन्ती मोक्तानले कालजयी आफ्ना गीत प्रस्तुत गरिएको सो कार्यक्रममा महिला साहित्यकारहरूको साहित्यिक यात्राबारे परिसंवाद पनि गरिएको थियो। परिसंवादमा भवानी खतिवडा, मुना अर्याल, आँचल साहित्य कलापुञ्जकी अध्यक्ष भावना सापकोटा र झरना साहित्यिक परिवारकी अध्यक्ष गायत्री रुपाखेती सहभागी थिए।
महिलाहरूलाई घरायसी जिम्मेवारीले साहित्य सिर्जनामा कठिनाइ भए पनि पछिल्लो समय साहित्य सिर्जनामा सफलता हासिल गरेको खुसी परिसंवादमा प्रस्तुत गरिएकाे थियो।
